आम्हाला हा प्रश्न नेहमी विचारला जातो. आमचे कॅलेंडर बनविण्या आधी आम्ही ह्या प्रश्नाचा खोलवर विचार केला. वैयक्तिक दृष्ट्या मासे खाणे सोडून देणे हा समुद्री पर्यावरणावर आपला वैयक्तिक वाईट परिणाम कमी करण्याचा करण्याचा सर्वात प्रभावी उपाय आहे. पण मासे खाणे सोडून देणे हा सार्वजनिक धोरणाचा भाग होऊ शकतो का? किंवा ह्या विचारसरणीचा प्रचार व प्रसार केला पाहिजे का? असे प्रश्न उभे राहतात. ह्या प्रश्नांबद्दलचे आमचे विचार आम्ही येथे मांडले आहेत. 

आज मासे हा करोडो भारतीयांच्या आहाराचा भाग आहे आणि मासेमारी हे लाखो भारतीयांच्या उपजीविकेचे साधन आहे. जर आपण मासे खाणे सोडून देण्याला प्रोत्साहन देणार असू तर खालील प्रश्नाचा विचार करायला हवा 

१. ज्या लोकांचा मासे हा आहाराचा भाग आहे त्यांच्यासाठी आपल्याकडे इतर पर्याय उपलब्ध आहेत का ?

२. हे पर्याय समुद्राशी संबंधित आहेत कि जमिनीशी संबंधित ?

३. जर हे जमिनी संबंधित पर्याय असतील आणि त्यांचे विस्तृतीकरण जरुरीचे असेल तर त्याचा जमिनीवरील परिसंस्थेवर (जंगले, झाडे, माळराने, वन्य पशु ,पक्षी, मृदा इत्यादी) काय परिणाम होईल. जमिनीवरील परिसंस्थेनवर सुद्धा हल्ली संकटात आहेत. असे असताना त्या अशा प्रकारचे विस्तृतीकरण सहन करू शकतील का ?

३. मासेमारीवर उदरनिर्वाहाच्या दृष्टीने, सांस्कृतिक दृष्टीने अवलंबून असणाऱ्या सामाजिक घटकांवर मासेमारी बंद होण्याने काय परिणाम होईल? 

आम्ही ह्या प्रश्नांची उत्तरे विविध विषयातील साहित्यात शोधायचा प्रयत्न केला. पण आम्हाला ह्या प्रश्नमाद्द्ल समाधानकारक संशोधन कुठे आढळले नाही. जर तुम्हाला ह्या विषयांबद्दलचे काही संशोधन आणि साहित्य माहित असेल तर आम्हाला जरूर कळवा. आम्ही ह्याबद्दल नक्कीच विचार करू. 

मासे खाणे सोडून देण्याच्या विचारामागे एक नैतिक मुद्दा सुद्धा आहे. आणि तो म्हंणजे प्राणिमात्रांच्या संवेदनांचाआदर करणे. खरे तर कुठलेही  मानवी क्रियेमुळे कुठल्याही मानवेतर (प्राणी, पक्षी, वनस्पती इत्यादी) जीवावर कुठल्याही प्रकारची इजा, वेदना किंवा अनैसर्गिक बदल होऊ नयेत. पण काही मूलभूत जैविक बंधनांमुळे मानवाला मानवेतर जीवांवर अवलंबून राहण्यावाचून इलाज नाही आहे. अशा परिस्थितीत जेंव्हा आम्ही विविध मानवी आहार आणि ते आहार मिळविण्याच्या विविध पद्धती (शेती, पशुपालन, शिकार) ह्यांचा विचार केला तेंव्हा कुठली एक पद्धत कुठल्या दुसऱ्या पद्धतीपेक्षा नैतिकदृष्ट्या उजवी आहे अशी मिमांसा करणे आम्हाला फार कठीण गेले. आणि असा निर्णय घेण्यास आम्ही असमर्थ आहोत असे आम्हाला कळून आले. 

वरील कारणांमुळे आम्हाला मासे खाणे बंद करणे पर्यावरणास संवर्धनास पोषक आहे किंवा नैतिकदृष्ट्या वरचढ आहे अशा कुठल्याच बाबतीत समाधानकारक उत्तर मिळाले नाही. म्हणून आंम्हाला मासे खाणाऱ्यांना माशांची जैवविविधता, त्यांच्या जगण्याच्या पद्धती ह्यांची ओळख करून देणे आणि आहारात ह्या गोष्टींचा विचार करून बदल करण्यास सुचवणे हे जास्त योग्य वाटले.